Онлајн продавница што продава и додека спиете.
Каталог, филтри, кошничка, наплата и мерење во еден систем. Пред да зборуваме за цена, на оваа страница пишува што ја поскапува продавницата, што се наплаќа посебно и кога продавница воопшто не ви треба.
За кого е
Продавница не е за секој што продава.
Има смисла ако
- Имате производи со јасна цена и знаете колку ве чини доставата.
- Некој веќе купува кај вас преку пораки, па тоа допишување може да стане нарачување.
- Продавате и надвор од вашиот град, или би сакале да почнете.
Нема смисла ако
- Продавате услуга за која се преговара, а не производ што се избира. Таму подобро работи страница со прашалник.
- Немате кој да пакува и да испраќа. Продавницата не ја решава логистиката, само ја забрзува.
- Цената ви се менува од купувач до купувач. Тоа е B2B случај и бара друга поставеност.
Проблем
Три работи што ја убиваат онлајн продажбата.
Купувачот не го наоѓа производот
Каталог без филтри и без пребарување значи листање додека не му здодее. Најголемиот дел од напуштањата се случува пред кошничката, не во неа.
Наплатата бара премногу
Задолжителна регистрација, десет полиња и нејасна цена на доставата. Секој непотребен чекор ве чини дел од нарачките, а тоа не се гледа додека не се измери.
Не знаете што се продава
Без мерење не се знае кој производ го носи прометот, од каде доаѓа купувачот ниту каде откажува. Залихата тогаш се нарачува по чувство.
Што добивате
Шест работи што продавницата мора да ги има.
Ова е основата на секое ниво. Разликата меѓу нивоата е во обемот и поврзувањата, не во тоа дали ова постои.
Каталог и филтри
Категории, филтри според тоа по што купувачот навистина избира, и пребарување што поднесува грешка во куцањето.
Страница на производот
Варијанти, состојба на залиха, цена без изненадувања и галерија. Страницата на производот е најчестиот влез од Google, не почетната.
Кошничка и нарачување
Нарачување без задолжителна регистрација, со цена на доставата што се гледа пред последниот чекор.
Наплата
Плаќање при достава, уплатница и картичка, колку што треба. Деталите се подолу, во делот за наплата.
Панел за вас
Нарачки, статуси, залиха и измена на производи без мене. Продавница што мора да ја ажурира некој друг не е ваша продавница.
Мерење на продажбата
Кој производ се продава, од каде дошол купувачот и на кој чекор откажува. Без тоа не се знае каде да се вложува.
Платформа
Три патишта, без идеологија.
Немам омилена платформа. Работам со три и за секоја знам кога се исплати. Изборот оди според вашиот каталог и начин на работа, не според тоа што е мене побрзо.
WooCommerce
Основа на WordPress, најмногу готови решенија за достава и наплата во регионот, а вие останувате сопственик на сè. Одржувањето чини повеќе отколку кај Shopify бидејќи додатоците се ажурираат.
Се избира кога
Каталог до неколку стотини производи, потребни локални поврзувања и желба ништо да не зависи од месечна претплата кај странска фирма.
Shopify
Сè работи веднаш и ништо не се одржува, но се плаќа месечно и провизија по нарачка, а прилагодувањата одат само дотаму додека платформата дозволува.
Се избира кога
Сакате брзо да почнете, каталогот е едноставен, и месечниот трошок ви е поприфатлив од еднократно вложување.
Custom
Пишано за вашиот случај, без слој што не се користи. Најскапо за изработка и најевтино за работа кога каталогот е голем или логиката на наплата е необична.
Се избира кога
Имате ERP или магацин што мора да биде извор на вистината, B2B цени по купувач, или продажба што не се вклопува во ниту еден готов систем.
Ако веќе имате продавница на некоја од овие платформи, не ја селам без причина. Селидбата се прави кога платформата навистина му пречи на работењето, а не затоа што јас би избрал поинаку.
Наплата
Како купувачот навистина плаќа.
Ова се начините на наплата што навистина сум ги поставувал. Не набројувам она што не сум го работел, зашто тоа се гледа дури кога ќе запне, а запнува секогаш на денот на лансирањето.
При достава
Плаќање на курирот при преземање. Во регионот и понатаму најголемиот дел од нарачките, и продавница без тоа губи купувачи што не сакаат да платат однапред.
Уплатница
Профактура и уплата на сметка. Бара рачна проверка на уплатата, но е неизбежна кога купуваат фирми и буџетски корисници.
Monri или WSPay
Плаќање со картичка кај домашни даватели, поврзано со сметка во банка овде. Вообичаениот пат за продавница што наплаќа во регионот.
Stripe
Плаќање со картичка за продажба во странство и за претплати. Се поставува кога купувачите плаќаат во евра или долари.
Секој картичен давател има своја провизија по трансакција и своја постапка за одобрување, и тоа оди директно меѓу вас и него. Јас го поставувам поврзувањето. Нивните надоместоци не ги наплаќам и нивното одобрување не можам да го забрзам.
Во пракса
Три системи што работат секој ден.
Не се демо страници. Сите три фирми ги користат во работата, и на сите три се менувало и доградувало по лансирањето.
- mglass-design.com
M Glass Design
Каталог на LED огледала со конфигуратор на опции. Купувачот избира димензија и светло пред да испрати барање, па барањето доаѓа веќе определено.
- tus-art.com
Tuš Art
Продажба и мерење на приходот на едно место. Панелот покажува што е продадено и колку е заработено, без рачно собирање.
- staklodom.com
StakloDom
Каталог на услуги и производи со барање по ставка. Структурата е поставена така што секоја ставка може да добие своја страница во пребарувањето.
Како оди
Пет чекори до првата нарачка.
Рокот зависи од бројот на производи и поврзувањата, па се кажува во понудата по првиот разговор, а не пред него. Она што не се менува е редоследот.
- 01Разговор и обем
Поминуваме низ каталогот, доставата и наплатата, а од тоа следат нивото и платформата. Од тој разговор излегува понуда со фиксен износ.
Од васСписок на производи, барем приближно, и начинот на кој сега примате нарачки.
- 02Структура на каталогот
Поставувам категории, својства и филтри. Овој чекор одлучува дали купувачот ќе го најде производот, и најскап е за менување подоцна.
Од васПотврда на категориите и по што вашите купувачи навистина избираат.
- 03Изработка и наплата
Ја работам продавницата и ги поврзувам наплатата и доставата. Плаќањето со картичка е во тестен режим додека давателот не ја одобри сметката.
Од васПодатоците за отворање сметка кај картичниот давател, ако оди картичка.
- 04Внес и два круга поправки
Ги внесувам првите производи како образец и покажувам како се внесуваат останатите. Два круга помали измени се вклучени.
Од васФотографии и описи на производите, и забелешки собрани на едно место.
- 05Лансирање и предавање
Пуштаме во работа, проверуваме една вистинска нарачка од почеток до крај, и ви ги предавам пристапите и кратка обука за панелот.
Од васЕдна пробна нарачка што сами ќе ја направите, за да видите што гледа купувачот.
Три нивоа
Избирате според каталогот, не според буџетот.
Нивото се одредува според тоа колку производи имате и што мора да знае продавницата, а не според тоа колку сте спремни да потрошите. Распонот во рамките на нивото е вистински: долната граница е едноставниот случај, горната оној со поврзувања.
Starter
Распон50.000 до 67.000 ден.За когоПрва продавница, уреден каталог и едноставна достава.
- До стотина производи
- При достава и уплатница
- Една земја на достава
- Основно мерење на продажбата
Growth
Распон83.000 до 135.000 ден.За когоПродавница што веќе продава и сега ја забавува рачната работа.
- Варијанти и поголем каталог
- Плаќање со картичка
- Поврзување со курир
- Мерење по производ и извор
Custom
Распонод 135.000 ден.За когоПродажба што не се вклопува во ниту еден готов систем.
- Врска со ERP или магацин
- B2B цени по купувач
- Сопствена логика на наплата
- Повеќе јазици или пазари
Цените не го вклучуваат ДДВ
Посебни ставки
Ова не е во цената на изработката.
Ниту една од овие четири ставки не е скриена и ниту една не е моја заработка. Пишуваат овде затоа што најчесто се откриваат дури на крајот, кога буџетот е веќе потрошен.
Надоместоци за наплата
Картичниот давател наплаќа провизија по трансакција, понекогаш и месечен надоместок. Договорот е меѓу вас и него и се плаќа нему, не мене.
Лиценци и претплати
Додатоците за достава, фискализација или напредни филтри често се плаќаат годишно. Кои се потребни се знае по разговорот, и тогаш добивате список со износи.
Внес на каталогот
Поставувањето на структурата и внесот на првите неколку производи како образец се во цената. Внесот на целиот каталог не е, зашто тоа знае да биде поголема работа од самата изработка.
Фотографии и описи
Фотографиите на производите и текстовите на описите не се во цената. Лоша фотографија ја намалува продажбата повеќе од која било техничка ситница, па тоа порадо го препорачувам отколку да го прескокнам.
Цена
Што ја поскапува продавницата.
Цената на продавницата не се смета по број на страници туку по тоа колку од неа мора да работи само. Ова е списокот по кој во разговорот се движиме нагоре или надолу.
Ја спушта цената
- Каталог веќе уреден во табела, со цени и шифри
- Производи без варијанти
- На почетокот само при достава и уплатница, картичка подоцна
- Еден јазик и една земја на достава
Ја крева цената
- Голем број производи, зашто растат и внесот и одржувањето на каталогот
- Варијанти по големина, боја или материјал, секоја со своја залиха
- Поврзувања со системи што веќе ги користите
- Плаќање со картичка, зашто бара одобрување од давателот и тестирање
- Врска со ERP или магацин како извор на вистината
- Достава со повеќе правила, зони или курири
- B2B цени, односно различна цена за различен купувач
Не е вклучено
Што продавницата не решава.
Ова го пишувам однапред, зашто разочарувањето по лансирањето чини повеќе од разговорот пред него.
- Фотографирање на производите и пишување описи за целиот каталог
- Пакување, испраќање и комуникација со купувачите по нарачката
- Буџет за огласи и водење кампањи
- Надоместоци на картичниот давател и годишни лиценци за додатоци
Прашања
Што најчесто ме прашуваат.
- Колку трае изработката на продавница?
- Зависи од бројот на производи и поврзувањата, па рокот го кажувам во понудата по првиот разговор. Најдолго обично не трае изработката туку чекањето на одобрување од картичниот давател и на фотографиите.
- Можам ли сам да внесувам производи?
- Можете и треба. Затоа панелот е дел од секое ниво, а при предавањето добивате кратка обука. Првите производи ги внесувам јас, како образец по кој се прават останатите.
- Колку чини плаќањето со картичка?
- Провизијата ја одредува картичниот давател и се плаќа нему, по трансакција. Јас го поставувам поврзувањето и тоа е во цената на изработката, но нивните надоместоци не се и не одат преку мене.
- Што ако имам илјада производи?
- Тогаш внесот на каталогот е одделна работа и така се и пресметува. Постои и пат преку увоз од табела или од постоечки систем, и речиси секогаш е поевтин од рачен внес.
- Можам ли да продавам во странство?
- Можете, но тоа бара одлуки за валута, достава и данок пред одлуките за изглед. Тоа е нивото custom и за него се зборува на почетокот, не по лансирањето.
- Што ако продавницата не тргне?
- Тогаш првото прашање е дали воопшто некој ги бара вашите производи на интернет. Затоа порадо прво правам анализа отколку продавница, ако во тоа не сум сигурен.
Следен чекор
Прво да видам што продавате.
Напишете што продавате и како сега примате нарачки. Одговарам кое ниво е вашето, на која платформа би го работел тоа и колку реално би ве чинело.